Pirmado na ni President Ferdinand Marcos, Jr. ang hagna ang naga-amyendar sa Agricultural Tariffication Act.
Diri nakabutang nga ginatugutan ang tiglikom sang Department of Agriculture (DA) nga mag-deklarar sang food security emergency kun may yara sang matumod nga kakulangan sa suplay sang bugas ukon kun may indi kinaandan nga pagsaka sa presyo.
Suno kay Marcos, paagi ini agud nga masigurado nga barato gihapon ang presyo sang bugas kag masarangan gihapon baklon sang mga Pilipino.
“In cases of sudden rice shortages or price hikes, the DA will now be empowered to take the necessary actions to stabilize the market. This will help ensure that the price of rice remains affordable and accessible to every Filipino,” kabahin sang pahayag sang presidente sa ceremonial signing sang Republic Act 12708 sa Malacañang.
Antes pa man maka-deklarar sang emergency ang DA secretary, kinahanglan anay nga may advice nga mabaton halin sa National Price Coordinating Council nga amo naman ang magahimo sang formula kag dapat magtumod kun san-o nagakatabo ang shortage sa suplay kag ang abnormal increase sa presyo.
Magluwas sa pagdeklarar sang food security emergency, mahimo man mabaligya sang DA ang rice buffer stocks sa mga lugar nga may krisis. Mahimo man ini maka-import sang bugas kun indi na bastante ang gina-produce sang local nga mga mangunguma.
Kabug-usan nga P5 billion (halin sa anuman nga source sang wala pa nagamit nga pondo sang DA) ang mahimo maggamit sa pagbakal sang bugas kun may yara sang food security emergencies.
Ini nga pirmado nga layi ang nagapalawig man sang implementasyon sang Rice Competitiveness Enhancement Fund (RCEF) tubtub sa 2031 kag ginpasaka man ang annual allocation halin sa P10 billion pa-P30 billion.#
