Ginapaabot sang Department of Agriculture (DA) nga mahimo maglab-ot sa 5 million metric tons ang imported nga bugas sa 2026 bangud sang epekto sang El Niño.
Suno kay DA Secretary Francisco Tiu Laurel Jr., sa normal nga sitwasyon, nagakinahanglan lamang ang pungsod sang 3.8 tubtob 4 million metric tons.
Apang bangud sang El Niño, posible nga kinahanglanon ang dugang nga importasyon agud masiguro ang bastante nga suplay sang bugas sa pungsod.
Samtang, ginapaabot naman sang ahensya nga mabuhinan ang importasyon sang bugas kag mahimo nga 3.8 million metric tons sa 2027.
Suno kay Tiu Laurel, ginahimo na subong ang pagpasulod sang dugang nga suplay nga mahimo gamiton sa una nga quarter sang masunod nga tuig.
Ginsiling man sini nga importante nga mapabilin ang masobra sa 60 ka adlaw nga buffer stock sang bugas bangud sang indi na mapaktan nga pagbag-o sang klima.
“We are already front-loading what we need for the first quarter of 2027. And we need to maintain more than a 60-day buffer because the climate is different now,” suno sa tiglikom.
Ang Pilipinas amo ang pinakadaku nga importer sang bugas sa bilog nga kalibutan.
Ang padayon nga pag-ulan bangud sang habagat, upod sa nagahilapit nga epekto sang El Niño, ang ginalantaw nga mahimo magresulta sa pagmala sang duta kag kakulang sang tubig nga magaapekto sa suplay sang bugas kag makapasaka sa presyo sang pagkaon.
Sang nagligad nga tuig, naka-import ang Pilipinas sang 3.39 million metriko tonelada nga bugas.#
