Tuman ang pagpasalamat ni Department of Agriculture (DA) Secretary Emmanuel Piñol sa mga Vietnamese crew nga nagsalbar kag nagtatap sa 22 ka mga manugpangisda nga Pilipino nga naglutaw-lutaw sa baybayon sang Recto Bank.
Ini matapos nga ginsalakay sang Chinese vessels ang sakayang pandagat sang mga Pinoy.
Suno kay Piñol , iligal ang pagsulod sang China sa Reed Bank bangud ini ang exclusive economic zone sang pungsod.
Dugang pa sang natungdan, nagakadapat lang nga pasalamatan ang Vietnamese bangud sa ila pagbulig sa mga Pilipino kag ila pa ini nga ginpakaon kag ginhatagan sang bayo nga mahimo mailis agud nga indi matugnawan ang 22 ka mga manugpangisda.
Hugot man ang pagpati ni Piñol nga kinahanglan kasuhan ang Chinese crew bangud may yara sila sang sala sa diin ila ginpabay-an ang mga Pilipino nga maglutaw-lutaw sa baybayon sa baylo nga salbaron nila.
Ginpakigbahin naman sang mga manugpangisda nga Pilipino ang pinaagi sang pag-amuma sa ila sang mga Vietnamese crew.
Nakibot sila nga nakahanda na ang mga pagkaon lakip na ang tinapay, manok kag bayo.
Bangud nga indi mag-intindihanay ang mga manugpangisda nga Pilipino kag Vietnamese crew sa nagkalain-lain nga mga lenggwahe, ginpakamaayo na lang sang mga Pilipino nga mag sign language.
Gintinguhaan pa suno sa mga Pilipino nga palipayon sila sang mga Vietnamese sa pihak sang ila kakulba nga nabatyagan bangud sa natabo.
Samtang ginkumpirma naman sang Chinese Embassy nga ang fishing vessel ang nagikan sa Guangdong province sa China.
Nahibaluan nga sang Hunyo 9, 2019, nasalakay sang Chinese vessel ang sakayan sang 22 mga Pilipino kag ginpabay-an lamang apang gintawag ni Presidente Rodrigo Duterte nga isa ka sahi ini sang ‘maritime incident’ lamang.
