Ginkumpirma sang Department of Agriculture (DA) nga nagpositibo sa heavy metals kag salmonella ang P4.1 million nga balor sang puti nga sibuyas nga halin sa China kag gin-smuggle sa Pilipinas.
Nakuha ang kumpirmasyon paagi sa tests sang Bureau of Plant Industry-Plant Products Safety Services Division kag National Plant Quarantine Services Division.
Matandaan nga 34 metric tons nga illegal shipment ang nakumpiskar sang awtoridad sa Mexico, Pampanga sang Abril 26.
Nag-abot ang shipment sa Subic Port paagi sa Hong Kong-flagged nga SITC Hochiminch.
Suno naman kay DA Secretary Francisco Tiu Laurel Jr., importante gid nga mapunggan ang pag-abot sang kaangay sini nga agricultural commodities sa local markets bangud delikado ini para sa mga tawo.
Magluwas sini, daku man ang risgo nga makapalapta ini sang sakit sa mga tanum kag makapadamo man sang peste.
Suno pa sa DA, ang heavy metal poisoning ang mahimo makaresulta sa cancer kag major body organ damage, samtang ang salmonella bacteria naman ang makatuga sang food poisoning kag iban pa gid nga mga impeksyon.
Ginpasalamatan man ni Laurel ang Philippine National Police (PNP)-Criminal Investigation and Detection Group (CIDG) para sa madasig sini nga pag-akto batok sa amo nga iligal nga shipment.
