Ginakonsiderar sang Department of Agriculture (DA) ang pagbutang sang price cap ukon maximum price sa bugas bangud sang epekto sang gyera sa Middle East sa presyuhanay sang produktong petrolyo.
Suno kay Agriculture Secretary Francisco Tiu Laurel, Jr., diskusyunan sang ahensya ang implementasyon sini una sa imported rice antes posible isunod ang local rice.
Pahayag sang tiglikom, ginalantaw sang DA nga may ceiling ukon indi dapat maglapaw sa P50 per kilo ang baligyaanay sang well-milled rice.
“Pag-aaralan namin moving forward kung pwede ba mag-impose ng price cap sa sitwasyon ngayon para di mapektuhan ang palay,” suno kay Laurel.
Ginpaathag sini nga nagsaka ang presyo sang bugas sa nagligad nga binulan bangud sa manubo nga suplay kag bangud sa import ban nga ginpatuman anay.
Apang bangud nagsugod na ang harvest season, ginalantaw suno sa iya nga maga-estable na liwat ang presyo.
“Luckily, naman ang kasagsagan ng ating harvest season is starting today actually up to hanggang end of April. Marami tayo harvest. So there’s a chance ma temper rises in prices at baka may chance pa bumaba ng konti,” dugang niya.
Nakalab-ot naman sa ahensya ang reports nga may retailers sang imported rice nga nagamato-mato sa pagpasaka sang presyo nga nagalab-ot na sa P60 kada kilo.
“Kung hindi tumino mga importer dyan sa Cebu at mataas pa rin benta nila, gagawin ko na lang kami na lang magbebenta sa Cebu, kami na mag iimport, kami na magbebenta. Yung mga importer doon, wala na sila ibebenta,” suno sa tiglikom.
Dapat suno sa iya nga yara lang ini sa P48 tubtub P50 per kilo.
Magluwas diri, may reports man nga may traders nga gina-repack ang imported rice kag ginabutang sa sako nga may label nga local rice agud nga may rason sila sa mataas nga presyo.
“May profiteering angle kami nakikita ngayon. At kailangan, iyon na nga, iyong pakiusap ko sa ating mga mamimili kung imported rice ‘yan, huwag kayong papayag na gano’n kataas iyong presyo. At subukan ninyong tawaran dahil this is not the time for profiteering,” suno pa sa agriculture chief.
Nagaplano ang DA nga mag-conduct sang mas masangkad nga market inspections sa bulig sang law enforcement kag regulatory agencies agud matapna ini nga mga buluhaton sang iban.#
