ILOILO CITY–Tuyo sang Department of Agriculture (DA) ang pag-classify sa mga bugas sa apat ka kategorya.
Ini bangud nga mas nagataas pa ang presyo kun madamo ang nakapangalan sa bugas.
Sa interview sang Bombo Radyo, ginpahayag ni DA Secretary Emmanuel Piñol, iya ginpahayag nga mahimo tumuron ang bugas bilang regular milled rice, well milled rice, whole grains head rice kag special rice.
Ang regular milled rice ang pagabaklon sa P38 kada kilo, well milled rice sa P40-P42 kada kilo, whole grains head rice sa P44 kada kilo kag ang special rice naman ang nagadepende sa kanamion sang bugas sa diin posible nga mas mataas ang presyo sini ipaanggid sa tatlo ka bugas nga nasambit.
Italana man ang Suggested Retail Price (SRP) sa kada bugas agud masiguro nga indi mahulag ang presyo kag magapabilin ini sa presyo nga ginkasugtan.
Suno kay Piñol, pagabantayan sang National Food Authority (NFA) ang mga retailers agud masigurado nga wala sang manugbaligya nga nagalapas sa igapatuman nga SRP.
Ginpaathag man ni Piñol nga usisaon sang DA ang mga rice boxes nga nagakadapat nakasarado kag indi nakabukas agud masigurado man ang ikaayong lawas sang mga kunsumidor.
Dugang pa sang tiglikom, mahimo nga iga-repack na lang ang mga bugas sa plastic sa diin naka-separar na ang kada kilo sa baylo nga igabutang pa sa mga sako ang bugas.
Nahibaluan nga ang plano ni Piñol ang posible iga-patuman na sa masunod nga tuig.