Nagapadayon ang imbestigasyon sang La Paz Police Station angot sa shooting incident sa Zone 3 Barangay Ticud, La Paz, Iloilo City.
Patay sa insidente ang mga biktima nga sanday Earl Jonathan Gatin, 18, residente sang nasambit nga barangay kag Albert Llupar, 18, residente sang Brgy. North Baluarte, Molo, Iloilo City.
Samtang pilason naman si Renz Anthony Mahusay, 18, sang Brgy. Ticud, La Paz.
Sa interview sang Bombo Radyo kay Police Major Jose Val Ladublan, hepe sang La Paz Police Station, iya ginpahayag nga antes natabo ang insidente, naangot pa ang biktima nga si Gatin sa isa ka komosyon ukon kinagamo.
Suno kay Ladublan, nagapakig-angot na sila subong sa mga indibidwal nga naangot sa amo nga komosyon agud makakuha sang dugang nga impormasyon.
Dugang pa niya, dako ang posibilidad nga daan nga hiligut-anon ang motibo sang krimen.
Nakuha naman sa insidente ang siyam ka empty shell sang .45 caliber pistol.
Samtang, suno naman sa tag-iya sang isa ka furniture shop, matuod nga may natabo nga komosyon sa atubang sang iya pwesto apang wala siya sang ideya kun sin-o ang mga indibidwal nga naangot sa amo nga kinagamo.
Sa interview sang Bombo Radyo kay alyas, Nonong, residente sang Zone 3 Barangay Ticud, La Paz, Iloilo City, iya ginpahayag nga sang natabo ang komosyon, gintinguhaan pa sang iya hinablos nga amo man ang isa niya ka tinawo sa shop nga pangsawayon ang mga indibidwal nga nagahangkatanay sang away.
Apang indi man masaway ang mga ini rason nga gintawgan na lang nila sang mga barangay official.
Sa subong, indi mapat-od sang natungdan kun isa ang grupo nanday Gatin sa na-involve sa amo nga kinagamo.
