ILOILO CITY-Temporaryo nga nagsirado ang dalan sa atubang sang Roll on- Roll off port sa Lapuz Norte,Iloilo CIty matapos natumba ang poste sang nasalawid sang isa ka truck ang mga linya sang kuryente nga ginapahayag nagaangot sa daan nga poste sang Panay Electric Company apang gin-expropriate na sang More Electric and Power Corporation.
Sa interview sang Bombo Radyo kay Jeoffrey Gabayeron, driver sang truck nga nalambudan sang mga linya sang kuryente, iya ginpahayag nga naatrasan sang loader truck nga inugkarga sa Roll on- Roll off padulong sa Guimaras ang nasambit nga mga linya sa diin naluka gid ang poste.
Wala nagdugay, natumba gid ang poste sa diin nagtupa ini sa truck nga ginamaneho ni Robert Morcillo kag nalab-ot naman sang mga linya sang kuryente ang truck nga ginamaneho ni Gabayeron.
Bangud sini,wala nakalabay ang dalagko nga mga salakyan magluwas lang sa mga motorsiklo kag traysikad.
Ang nasambit nga poste ang nahamtang sa kilid mismo sang Brgy Hall sang Lapuz Norte, Iloilo City.
