Importante ang paghatag sang updates sa imo girlfriend ukon boyfriend agud mapabilin nga solid ang inyo nga relasyon kag agud makasalig ini nga safe lang ikaw pirme.
May kilala ka bala nga halos oras-oras na nga nagapangayo sang update nga halos kada tikang kag liso sang karelasyon, dapat gid nga isugid sa iya?
Ini ang kaso sang 18-anyos nga babaye sa China nga gintago lamang sa pangalan nga Xiaoyu.
Una nga tuig sa kolehiyo si Xiaoyu sang nagseparar na ini sa iya ginikanan bangud kinahanglan sini magtinir malapit sa iya nga university.
Didto man siya nakaangkon sang boyfriend kun sa diin nangin amat-amat na siya nga nangin clingy kag dependent tubtub sa punto nga naga-demand na ini nga kinahanglan nga pirme sila naga-istoryahanay.
Halos indi naman makaginhawa si boyfriend bangud sa batasan sang babaye.
Nakaagi man nga sulit-sulit ang message ni Xiaoyu nga nagahingyo sa boyfriend nga buksan ang iya camera, kag sang wala naman nagsapak ang lalaki, wala gid nag-untat ang babaye.
Naglala ang sitwasyon kag naglab-ot pa sa punto nga 100 ka beses gid sa isa ka adlaw ang pagtawag ni Xiaoyu sa lalaki.
Bangud sa pagka-upset sang dalaga, ginpangguba pa sini ang mga gamit sa iya nga aparment.
Didto na kag nagtawag sang pulis ang boyfriend kag maayo na lang bangud nakaabot sila antes pa man nadayon ang tuyo sang babaye nga maglumpat sa balkonahe.
Gindala ini sa ospital kag sang ulihi nadiagnose nga may “love brain” ukon isa ka obsessive behavior sa romantic relationships.
Ini nga sahi sang borderline personality disorder ang nagaguwa sa tawo nga nagasuprer sa anxiety, depression, kag bipolar disorder.
Ginpahayag man sang doktor nga ini ang masami maangot sa unhealthy childhood attachments—ilabi na kun indi maayo ang relasyon sang isa ka tawo sa iya nga ginikanan ukon sa mga tawo sa iya palibot.
Ang mild cases sang love brain ang mahimo pa nga ma-manage paagi sa emotional management techniques samtang ang mga severe cases naman kaangay sa kaso ni Xiaoyu ang nagakinahanglan na sang medical intervention.#
