May nakit-an nga gasgas sa kinatawo kag alatrasan sang dalaga nga nasapwan nga wala na sang kabuhi sa ila balay sa Brgy Ingay, Tubungan, Iloilo.
Sa interview sang Bombo Radyo kay Dr. Owen Lebaquin, medico legal officer nga nagpatigayon sang autopsy sa lawas sang biktima, iya ginpahayag nga ini nga mga gasgas ang senyales nga gin-abuso sekswal ang 18-anyos nga si alyas Jeje.
Suno kay Lebaquin, naggwa man sa autopsy nga multiple traumatic injury at the head ang kabangdanan sang kamatayon sang dalaga bangud sa mga nakit-an nga mga lagob sa iya ulo nga posible tuga sang pagsumbag ukon ginbunggo ini sa matig-a nga bagay.
Magluwas diri, may mga lagob man sa butkon kag pilas sa kamot ang biktima.
May nakit-an man nga mga lagob sa iya paa nga posible patimaan nga nagabato ini samtang ginahimuslan.
