Ginkasugtan sang mga pumuluyo sang Banate, Iloilo kag sang quarry permittee nga ipakay-o na lang ang dalan nga ila ginareklamo.
Una na nga ginpa-Bombo sang mga residente sang Barangay Managopaya ang ila nga dalan nga ginalabayan sang mga truck nga nagapadulong sa quarry site sa Barangay Juanico.
Sa interview sang Bombo Radyo kay Sangguniang Bayan (SB) Member Arnulfo Babe, iya ginpahayag nga kun magguba ang tanom, magmasakit ang tawo ukon may mapatay nga sapat, kinahanglan nga idangop lang ini sa quarry agud nga mabaydan.
Suno kay Babe, gin-usisa nila ang mga dokumento sang quarry permittee kag kumpleto man ang mga ini.
Nahibaluan nga nagguba ang dalan sang Barangay Managopaya kag madasig nga maglutak rason nga delikado ini bangud madanlog para sa mga motorista.
Magluwas sa dalan, nagaakaapektuhan man ang mga kasapatan nga palangabuhian sang mga pumuluyo bangud posible nga mapatay ini tuga sang blasting ukon pagpalupok nga ginahimo sa quarry.
