Gintamnan sang saging, palawan, kag niyog sang mga residente ang half lane sang dalan sa Barangay Sinamay, Alimodian, Iloilo matapos nga ginkalkal kag ginpabay-an sang kontraktor sini.
Sa interview sang Bombo Radyo kay Engineer Romeo Andig, Head sang Iloilo Provincial Engineer’s Office, iya ginpahayag nga kontani gin-ideyahan sang kontraktor nga Bansoy Construction and Supply ang proyekto agud nga matapos ini gilayon.
Ginpatawag man sang natungdan ang Bansoy Construction and Supply agud nga sapolan ang pagpadayon sang proyekto.
Suno kay Andig, ang P18.2 million nga proyekto ang yara na sa 62% nga kompleto kon sa diin, Hunyo 2024 sang gin-umpisahan ini patukod.
Ginbuyagyag man sini nga matapos kontani ang dalan sa Disyembre 18, 2024 apang wala ini nahingaw rason nga dapat magbayad ang kontraktor sang liquidated damages nga P6,987 per day sa mga adlaw nga nagaligad samtang wala pa ini matapos.
Naghatag naman sang huol sa economic activities sang barangay ang wala matapos-tapos nga proyekto.
Wala paman sang tul-id nga sabat ang kontraktor kon magatambong ini sa pagsinapol nga patigayunon buwas nga adlaw.
