Ginpaabot nga suguran na ang pag-repair sang dalan sa Rizal Estanzuela, City Proper nga ginpabombo anay bangud sa mabaho kag maitom nga tubig nga nagadanaw sa lugar sa tion nga matapos na ang mga papeles sini.
Ini matapos madala sa supplemental budget sang siyudad ang proyekto kun sa diin nag-alokar sang ₱5 milyon ang City Government para sa renovation sang footwalk kag drainage system sa amo nga lugar.
Sa interview sang Bombo Radyo kay Punong Barangay Bienne Camacho sang Rizal Estanzuela, City Proper, ginpahayag sini nga magluwas sa bulig sang syudad may gin-allocate man nga pondo ang barangay council agud gilayon na nga makay-o ang drainage sa lugar.
Suno pa kay Camacho nga ila gid ginapangitaan sang long-term solution ang problema agud nga indi na makahalit sa pumuluyo.
Nagpangabay man ini sa kaiping nga barangay sang Barangay Rizal Pala-Pala Uno City Proper nga bululigan ang proyekto bangud makabenepisyo man ang mga pumuluyo sini.
Ginpaabot nga magasugod ang konstruksyon sa masunod nga semana agud mapadasig ang implementasyon kag agud masolbar gilayon ang sitwasyon.
