ILOILO CITY- Nagpanaog na sa posisyon bilang team manager sang football team sang Pilipinas si Dan Palami.
Suno kay Palami nga amo ang long-time Azkals official nga nakaupod na sang squad humalin sang 2009, ang iya desisyon ang may katuyuan nga hatagan ang bag-o nga Philippine Football Federation (PFF) President John Gutierrez kag ang iya management sang kahilwayan samtang nagapadayon sa paglab-ot a handom ang team.
Si Palami ang ginakabig isa sa pwersa sang pagbuhi sa men’s football team sang pungsod kun sa diin paagi man sa iya, nangin kabahin sang national team ang sampat nga mga players kaangay nanday Chieffy Caligdong, Phil kag James Younghusband, Neil Etheridge, kag Stephan Schrock.
Sa idalom man sang iya pagpamuno nga ang Azkals nakalab-ot sa semifinal round sang AFF Suzuki Cup sang 2010 kag nasulit ini sang 2012, 2014, kag 2018.
Napabilin sang Azkals ang momentum padulong sa appearance sa 2019 AFC Asian Cup, ang una nga bes nga nakalab-ot ang Pilipinas sa amo nga stage.
