ILOILO CITY – Sa labing una nga tini-on sa maragtas, maga-abanse sa quarter-finals ang Morocco matapos ang sensational penalty shootout win batuk sa Spain.
Matapos ang duha ka oras nga hampang, wala gid sang may naka-score kag ginpaagi sa penalty kick shootout agud nga matumod kun sin-o ang mangin winner kag magasulod sa quarterfinals.
Nagtakup ang hampang sa 3-0 pinaagi sa penalties nga nagpahugyaw sa Moroccan fans nga yara sa Education City Stadium.
Sa Morocco, ang naka-score amo sanday Abdelhamid Sabiri, Hakim Ziyech kag ang Spanish-born superstar wing-back nga si Achraf Hakimi.
Subong nga World Cup, nakasulod sa labing una nga tion ang Morocco sa Round of 16 humalin sang 1986 kag humalin sang 1970, ini ang labing una nga tion nga nakasulod sa quarters ang pungsod.
Sa bilog nga tournament, isa pa lamang ka goal ang napasulod sang Morocco.
Sa Spain naman, ang penalty kick ni Pablo Sarabia ang nag-igo sa post samtang gin-block naman sang Morocco goalkeeper nga si Yassine Bounou ang penalties nanday Carlos Soler kag captain Sergio Busquets.
Ang Red Fury ang ulihi nga nagdaog sa World Cup sang 2010.
Napaslawan ini nga makasulod sa group stage sang 2014 kag nalutos sa Round of 16 sang 2018.
Ginkasubo naman sang mga taga Espanya ang kalutusan sang ila team sa kamot sang ginakabig nga dark horse team sa FIFA World Cup.
