ILOILO CITY – Ginpanindugan ni Davao City mayor kag vice presidential bet Sara Duterte-Carpio nga indi ini magtambong sa bisan ano nga debate para sa nagahilapit nga May 2022 elections.
Ini ang pahayag sang alkalde sa ginpatigayon nga kampanya sini sa Parañaque City, kahapon, isa ka semana antes ang pinakauna nga presidential kag vice presidential debates sang Commission on Elections (Comelec).
Suno kay Sara, pinal na ang iya desisyon nga indi magpasakop sa bisan diin nga debate kag ginabilin nalang sa publiko ang pagpili sang ila pili-on nga bise presidente.
Nahibaluan nga si Sara Duterte subong ang nagapanguna sa mga surveys kag una na nga nag skip sa debate sang isa ka TV station sang nagligad nga bulan.
Samtang, wala naman ginsabat sang iya running mate nga si Ferdinand “Bongbong” Marcos Jr. kun bala matambong man ini ukon indi sa debate.
Una na nga ginpahayag sang chief of staff ni Marcos nga i-anunsiyo nila subong nga semana kun available ang anay senador para sa pinakauna nga debate sang Comelec.
