ILOILO CITY – Pormal na nga nagsumpa si Davao City Mayor Sara Zimmerman Duterte-Carpio bilang ika-15 nga bise presidente sang pungsod Pilipinas.
Ang inagurasyon ang ginpatigayon sa San Pedro Square sa Davao City.
Ini ang gin-administer sang iya law professor nga si Associate Justice Ramon Paul Hernando.
Ang nagkapot sang bibliya amo ang iya iloy nga si Elizabeth Zimmerman kag yara man ang iya amay nga si outgoing President Rodrigo Duterte.
Nagtambong man ang iya bana nga si Atty. Mans Carpio kag ang iya tatlo ka mga anak.
Yara man ang iya duha ka mga utod nga sanday Davao City Mayor-elect Sebastian Duterte kag Davao First District Representative Paolo Duterte.
Lakip sa mga dalagko nga personalidad nga nagtambong amo ang iya running mate nga si President-elect Ferdinand “Bongbong” Marcos Jr. kag asawa sini nga si Atty. Liza kag anak nga si incoming Ilocos Norte Representative Sandro Marcos.
Nagtambong man si former president kag subong Pampanga Representative Gloria Macapagal-Arroyo.
Yara man ang presensya sang kontrobersyal nga si Pastor Apollo Quiboloy kag pila ka mga incumbent kag incoming senators kag iban pa nga mga opisyal nga kaalyado niya.
Nagtambong man si Iloilo City Lone District Representative Julliene “Jamjam” Baronda.
Antes ang inauguration, nagpatigayon anay sang concelebrated Holy Mass sa San Pedro Cathedral.
Pormal na nga magapungko bilang bise presidente si Duterte-Carpio sa Hunyo 30.
Sa nangin mensahe ni Duterte-Carpio, gin-highlight niya ang mga leksyon nga nakuha niya nga mahimo nga magamit agud nga mabuligan nga mag-umwad ang pungsod.
Nagakadapat nga mag-commit sa Ginuo, sa pungsod kag sa pamilya.
Dugang pa niya, ang kabuhi niya ang pamatuod sang gahum sang Ginuo.
Lain man ang iya handum, apang gingiyahan siya sa direkasyon padulong sa pagka-abogada.
Bilang opisyal suno kay Duterte-Carpio, determinado ini nga tapuson ang tatlo ka sunud-sunod nga term bilang alkalde apang indi na matabo bangud isa na siya ka vice president-elect.
Sa iya oath, gin-reiterate ang iya responsibilidad bilang isa ka opisyal kag kabahin diri ang magsalbar kag magbag-o sang kabuhi sang tawo.
Gin-acknowledge man niya ang mga mangunguma kag manugpangisda, mga heath care workers, mga uniformed personnel, mga matampad nga negosyante kag mga manunudlo nga nagagiya sa aton sa bwas damlag nga may paglaum, seguridad, kabaskog, stability kag progreso.
Subong man nga adlaw, ginasaulog ang kaadlawan sang pungsudnon nga baganihan nga si Dr. Jose Rizal.
Ginpahayag ni Duterte-Carpio nga kabay nga ang adlaw nga ini ang magadugang sang kalayo sa aton tagipusuon agud nga mangin kaangay ni Rizal, kita ang mangin patriot man sa pungsod.
Nagpanawagan man ini sa mga Pilipino nga ululupod nga magbangon sa kada adlaw kag padayon nga palangga-on ang pungsod samtang nga nagakabuhi.
Dapat man nga ipakita naton ang aton pagpalangga sa pungsod pinaagi sa pag-atipan sang aton pamilya kag sang komunidad.
Subong nga father’s day, tion ini dapat nga nagaselebrar sang kaayo sang amay apang nag-upod ang tanan sa iya inagurasyon nga ginpasalamatan man niya.
Nangin highlight man sang mensahe sang incoming president ang problema sang mga kabataan nga ginalakipan sang kapigaduhon, ang trauma bangud sang pagkaguba sang pamilya, indi maayo nga parenting, gender confusion kag bullying, iligal nga droga, kaso sang sexually transmitted diseases, pagpang-abuso, teenage pregnancy, illiteracy, indi maayo nga mental health, misinformation sa internet kag recruitment sang mga rebelde.
Ginpahayag man niya nga ang disiplina kag edukasyon ang nagasugod gid sa panimalay.
Ang ini nga mga problema ang mahimo nga masolbar pinaagi sa pag-isa.
Importante suno sa iya nga magtu-o sa Ginuo, pagserbe sa pungsod kag pagproteher sang pamilya kag kabataan.
Suno sa iya, indi man siya ang pinakamaayo kag pinakama-alam nga tawo sa kalibutan apang wala sang makapirde sang iya tagipusuon.
