Nagalalain ang director sang marching band sang Iloilo Science and Technology University (ISAT-U) matapos malakip ang band room sa mga nahalitan sang nagluntad ang sunog pasado alas nueve kaina sang aga, Oktubre 31.
Sa interview sang Bombo Radyo kay Jerry Alcallaga, iya ginpahayag nga halos indi ini makapati nga sa isa lang ka pisok, madula ang ila tanan nga ginpundar kag ginpangabudlayan.
“Pagtawag sa akon, daw nagsalop ako sa lupa. Wala ko gani kabalo nga nakalab-ot na ko di [sa ISAT-U]. Kay tungod bala sa effort, foundation, mga ginpondar ko nga legacy [kag mga advocacy], pero madula man lang ang mga instrument ko,” suno pa kay Alcallaga.
Ginbalikan pa sini ang mga handumanan sa amo nga hulot kaupod anay ang mga estudyante sang buluthuan nga nangin kabahin man sang marching band.
“Daw indi ko gid mabaton dayon nga sa isang pisok lang madula na ang tanan dira,” pahayag sini.
Sa pagbanta sini, nagalab-ot sa masobra P1-million ang balor sang mga instrumento nga nahalitan bangud sa sunog.
Nagpanawagan ini sa mga alumni sang marching band nga ulikdan man ang eskwelahan kag magbulig kasunod sang natabo nga fire incident.
“Ginapanawagan ko lang sa mga band alumni, nagapanuktok gid ko sa inyo kabubut-on nga lantawon niyo man di aton nga sitwasyon. Diri kamo nag-grow sa aton gamay nga band room. Ginapangayo ko gid inyo hamili nga bulig,” kabahin sang panawagan sini.
Sandig sa inisyal nga pag-estimate sang Bureau of Fire Protection (BFP), nagdangat sa P158,000 ang balor sang halit nga ginbilin sang sunog sa Cultural Office, Physical Education room, Faculty Office kag nalakip man ang marching band room.
Sa interview sang Bombo Radyo kay Senior Fire Officer 1 Denmark B. Macoco, acting chief sang Investigation and Intelligence Unit sang Iloilo City Fire Station, iya ginpahayag nga mahimo pa maglain ang balor sang halit kun magpasa ang eskwelahan sang affidavit of fire loss nga amo man ang iga-deklarar sang BFP.
Nagpahanumdom naman ang BFP official sa publiko ilabi na sa mga magabisita sa patyo kadungan sang Undas nga i-check gid sang maayo ang mga appliances, kag i-unplug, i-switch off, ukon i-shut down ang kuryente antes maghalin sa balay.
Nagpanawagan man ini nga indi pagbayaan ang mga nakasindi nga kandila nga amo man ang masami nga ginahalinan sang kalayo.
Nahibaluan nga antes sa ISAT-U, may duha pa ka sunod-sunod nga sunog nga nagluntad sa Iloilo City kagab-i partikular sa Veteran’s Village sa City Proper kag sa Barangay Calaparan sa Arevalo.#
