ILOILO CITY – Wala ginakabig nga upang sang isa ka day care teacher ang iya balati-an sa pagpadayon sang iya propesyon.
Sa Good Morning Philippines program, ginpahayag ni Mylen Arsula, nga medical profession ang iya ginhandum sang una apang tuga sang sirkumstansya sa pagpangabuhi, ginpili niya nga mangin isa ka manunudlo.
Suno kay Arsula, 12 na siya ka tuig nga nagatrabaho bilang day care teacher kag sang 2016, gin diagnose siya nga may yara sang peptic ulcer tubtub nga sa sulod sang pila ka tuig nga pagpaidalom sa treatment, natukiban naman nga may yara siya sang systemic skin lupus tuga sang unhealthy lifestyle.
Ang systemic skin lupus suno sa natungdan ang indi makabig nga curable disease kag nagakinahanglan sang lifetime medication apang paagi sa pag-inum sang bulong, mahagan-hagan ang paglala sini.
Sa pihak sang kasakuon bilang isa ka manunudlo, ginpahayag ni Arsula nga wala niya naisipan nga mag-untat na lang sa pagtrabaho bangud nga natun-an na niya nga palanggaon ang nasambit nga propesyon.
Wala sang kabaylo suno sa iya ang pagpasalamat nga iya mabaton gikan sa iya mga estudyante.
