ILOILO CITY – Gin-aprubahan na sang Department of Budget and Management ang pagpagwa sang P25.16 billion para sa health insurance premiums sang mga pigado nga Pilipino.
Sa isa ka statement, gin-aprubahan ni Department of Budget and Management Secretary Amenah Pangandaman ang Special Allotment Release Order nga nagabalor sang P25,157,547,000 para sa Philippine Health Insurance Corp. sang Mayo 23.
Ang ginpagwa nga pondo ang maga-cover sang one-year health insurance premiums sang 8,385,849 nga mga qualified Filipino indigents nga naka-enroll sa ahensya.
Suno kay Pangandaman, mandato ni President Ferdinand R. Marcos Jr. nga ipasiguro nga mga Pilipino ang mahatagan sang kasarangan nga health care.
Ang pondo ang magahalin sa authorized allotments sa Fiscal Year 2023 General Appropriations Act.
Sang Abril, gin-aprubahan man sang Budget Department ang pagpagwa sang P42,931,355,000 agud nga mag-cover sang one-year health insurance premiums sang masobra 8.5 million senior citizens sa bilog nga pungsod.
