May ara sang nagakaigo nga pondo ang Department of Budget and Management (DBM) agud suportahan kag buligan ang Department of Labor and Employment (DOLE) para sa mga minimum wage earners.
Ginpasiguro sang ahensya nga may nakahanda ini nga contingency funds kun magpangabay ukon magpangayo man sang bulig ang Department of Labor and Employment agud palaparon ang pinansyal sini nga bulig para sa mga minimum wage workers nga naapektuhan sang pagsaka sang presyo sang gatong.
Suno kay Acting Budget Secretary Rolando Toledo nga may ara sang gin-allocate nga P21.3 bilyon para sa TUPAD program sang DOLE, apang ini para lamang sa mga displaced, under-employed, kag seasonal workers.
Una na nga ginpahayag sang Malacañang nga ila pagatun-an ang ginapanawagan sang publiko nga dapat mahatagan ang mga ini sang pinansyal nga bulig, indi lamang ang mga minimum wage earners kundi pati man ang middle class kag mga empleyado sang gobyerno nga naapektuhan sang oil crisis bangud sa tensyon sa Middle East.
Ginapanawagan man sang pila ka labor groups sa gobyerno nga hatagan sila sang monthly subsidy para sa masobra 5 milyon nga mga minimum wage earners sa pungsod.
Magluwas sa contingency fund, mahimo man gamiton sang Department of Budget and Management ang National Disaster Risk Reduction and Management Fund para pondohan ang iban pa nga mga programa sang gobyerno ilabi na nga madamo sa subong ang nagakinahanglan sang bulig.
