ILOILO CITY – Ginpaandaman sang Dangerous Drugs Board (DDB) ang ginapahayag dalagko nga personalidad sa Western Visayas bangud sa kahilabtanan sa illegal drug trade.
Sa interview sang Bombo Radyo Iloilo, ginpahayag ni DDB chairman Gen. Dionisio Santiago nga sa Bureau of Corrections pa lang siya sadto, natukiban na sini ang kaangtanan sang dalagko nga mga personalidad sa Rehiyon 6, sa drug lord nga si Peter Co nga preso sa New Bilibid Prison.
Apang nagpamalibad si Santiago nga hingadlan ang mga ini pero ginpahayag nga buhi pa ang nasambit nga mga personalidad kag ang iban, opisyal sang gobyerno.
Gin-athag ni Santiago nga indi lang Iloilo ang involve kungdi bug-os nga Western Visayas.
Ini ang rason suno sa opisyal kun nga-a indi mauntat ang illegal drug trade sa rehiyon bangud apisar preso na si Co, may mga nagahulag gihapon ini nga mga tawo sa guwa sang presuhan.
Maghalong na ang nasambit nga mga personalidad suno kay Santiago kag dapat mahadlok ang mga ini bangud wala sang may ginakilala ang kampanya sang administrasyon batok sa iligal nga droga.