“God forgive him and God bless him. He knows what he did to me, I suppose.”
Ini ang malip-ot nga pahayag ni anay Senador Leila de Lima para kay anay Presidente Rodrigo Duterte.
Isa si De Lima sa ginakabig pinaka-vocal nga kritiko sa maduguon nga drug war ni Duterte– kag sang ulihi, siya pa ang gin-akusaran nga nagapadalagan sang drug trade sa sulod sang New Bilibid Prison sang nagpungko siya bilang justice secretary agud pundohan ang iya 2016 senatorial campaign.
Sang na-detain si De Lima, madamo nga mga testigo ang nagbawi sang ila nga mga testimoniya batok sa iya.
Photo: PNA
Lakip sa pinakadaku nga pagbawi amo ang ginhimo ni former acting Bureau of Corrections chief Rafael Ragos nga nagbuyagyag sang 2022 nga ginpilit lamang siya ni former justice secretary Vitaliano Aguirre II nga magbinutig.
Sang nagligad lang nga Oktubre, nagbawi man sang statement batok kay de Lima ang anay pulis nga si Rodolfo Magleo kag ang police asset nga si Nonilo Arile bangud ila ginpahayag nga na-konsensya sila.
Sa subong, nagapadayon pa ang kaso ni de Lima gani indi pa sini ma-isa-isa ang plano sang iya nga legal team kag kun may mga tikang bala agud nga kasuhan man ang mga nagpatu-pato batok sa iya.
Kahapon, Nobyembre 13, sang ginpasugtan sang Muntinlupa Regional Trial Court Branch 206 nga makapyansa si De Lima sa iya nabilin nga drug case amo man ang iban nga mga akusado nga sanday former Corrections Director Franklin Bucayu, Ronnie Dayan, Joenel Sanchez, kag Jad Dera.
Halin sang Pebrero 2017 nga naka-detain si De Lima sa Camp Crame bangud sa alegasyon sa drug trade. #
