ILOILO CITY- Wala sang plano si anay Senadora Leila De Lima nga magpadalagan sa 2025 midterm elections.
Sa interview sang Bombo Radyo kay De Lima, iya ginpahayag nga apisar indi siya magkandidato sa ano man nga posisyon, suportado niya sa gihapon ang Liberal Party ilabi na nga siya ang nagaserbe tagpamaba sang partido.
Suno kay De Lima, suportahan man niya ang party-list nga Mamamayang Liberal.
Gin-athag man sini nga wala siya sang plano nga magbaton sang ano man nga posisyon nga itanyag sang administrasyon ni Presidente Ferdinand Marcos, Jr.
Natingala man ini kun sa diin naghalin ang impormasyon nga tanyagan siya ni Marcos sang posisyon.
Samtang, ginkalipay naman niya nga may pila ka nga mga pagbag-o sa administrasyon subong ni Marcos kun ipaanggid sa iya ni Duterte apang madamo gihapon sang nagakinahanglan sang reporma.
Nahibaluan nga kahapon sang nagbisita si De Lima sa Iloilo kun sa diin nag-deliver ini sang mensahe sa symposium nga may tig-ulo nga “Weaponization of Justice: Skirting the Line Between Human Rights and Compelling State Interest” nga gin-organisa sang UPV Scintilla Jvris Fraternity kag UP Stella Juris Sorority nga ginhiwat sa UPV Auditorium, Iloilo City campus.
