Naka-file na sang mga hagna ang mga mamalidha nga nagasuporta sa legislative agenda ni Presidente Rodrigo Duterte sa nabilin nga tatlo ka tuig sini nga termino.
Ang mga hagna ang gin-file antes pa man sang ika-apat nga State of the Nation Adress sang Presidente.
Masobra 2,500 ka mga hagna ang gin-file sa Kamara sa una nga adlaw sang 18th Congress saNG Hulyo 1 nga ginalakipan sang kontrobersyal nga death penalty, pag-postpone sang barangay kag Sangguniang Kabataan elections, pagpatukod sang mga departments on disaster resilience kag water resources kag madamo pa.
Indi magnubo sa duha ka mga hagna ang nagahingyo nga ibalik ang death penalty sa pungsod lakip na ang House Bill 368 ni Tarlac Representative Victor Yap kag House Bill 1588 ni House Minority Leader Bienvenido Benny Abante.
Ang hagna nga gin-file ni Abante ang may tinutuyo nga ibalik ang death penalty sa mga krimen may kaangtanan sa iligal nga droga kag plunder nga kaangay man sang ginhingyo ni Duterte sa Kongreso.
Suno kay Abante, umpisa pa lang sang iya termino sang 2004, iya na nga ginasuportaha ang pagbalik sang death penalty sa pungsod.
Samtang, ginfile naman nanday Camiguin Representative Xavier Jesus Romualdo ang House Bill 338; Albay Representative Joey Salceda nga gin-file ang House Bill 30 kag House Bill 1151 naman kay Majority Leader Martin Romualdez nga may tinutuyo nga makapatukod sang Department on Disaster Resilience.
Gin-file man ni Quezon City Representative Alfred Vargas ang House Bill 232 nga may tinutuyo nga makapatukod sang Department of Water agud nga ma solbar ang isyu sa kakulang sang tubig.
Samtang House Bill 158 naman ang gin-file ni Quezon City Representative Jose Christopher Kit Belmonte may kaangtanan sa National Land Use and Management Policy.
Sanday Speaker Alan Peter Cayetano kag mga mamalidha nagikan sa Makabayan Bloc ang nag-file man sang House Bill 10 kag House Bill 225 sa pagpatukod sang coconut levy trust fund.
Duha naman ka mga hagna ang gin-file para sa second package sang Tax Reform for Attracting Better and High-Quality Opportunities (TRABAHO) bill nga may tinutuyo nga panubuon ang corporate income tax rates sa 20% nagikan sa 30%.
Ini amo ang House Bill 313 ni Salceda kag House Bill 176 ni Nueva Ecija Representative Estrellita Suansing kag Sultan Kudarat Representative Horacio Suansing.
