𝗜𝗟𝗢𝗜𝗟𝗢 𝗖𝗜𝗧𝗬 – Ginpakigbahin sang deboto ni Nuestra Señora dela Candelaria ang milagro nga iya naeksperyensyahan kag kun paano ini nabuligan sa iya balatian.
Ini amo si George Susvilla, Jr., isa ka choreographer, residente sang Barangay Tabuc Suba, Jaro, Iloilo City, apang nagatinir na subong sa banwa sang San Enrique, Iloilo.
Sa interview sang Bombo Radyo kay Susvilla, iya ginpahayag nga nag-umpisa ang iya pagtuo kay Nuestra Señora dela Candelaria sang grade 1 pa lang ini sa diin ginadala ini sang iya amay antes sila magpadulong sa bantog nga Candelaria ‘bulang’.
Suno kay Susvilla, sang Hunyo 2018, nagpadulong ini sa Amerika upod sa Tribu Panayanon sang Iloilo City National High School.
Apang pagbalik sini sa Pilipinas, nagtaliwan ang iya utod nga lalaki sa diin nagbatyag ini sang depression bangud sa natabo.
Matapos sini, gin-mild stoke pa gid ini kag sang nagpaidalom sa CT Scan, natukiban nga naglapta na nga dugo sa sulod sang iya ulo sa diin ginpapreparar ini sang doctor sang kapin P400,000.
Diri na kag nagpangamuyo ini sa grotto ni Nuestra Señora de la Candelaria sa ibabaw sang Jaro Metropolitan Cathedral sa diin gintugyan na sini ang tanan iya nga balatian kag problema.
Sa indi ma ang lima ka bulan, nadula na ang sakit sa iya ulo kag pagpalaminhod sa kalawasan.
Magluwas diri, nakabalik naman ini sa pagtudlo sa Dinagyang.
Nagalaom man ini nga magserbe nga ehemplo sa iban ang iya istorya nga bangud sa pagtuo, nag-ayo sa iya balatian.
