Nagpatigayon na sang decontamination ang mga otoridad sa Pis-anan National High School sa Sibalom, Antique.
Kasunod ini sang natabo nga ginapatiha nga chemical poisoning nga nagresulta sa pagkalipong kag pagka-ospital sang 200 tubtob 300 ka mga estudyante matapos makahaklo sang baho nga kaangay sang luto nga bayabas.
Sa interview sang Bombo Radyo kay Mr. Rodel Esler, Head sang Municipal Environment and Natural Resources Office kag Information Office sang Task Force Pis-anan, iya ginpahayag nag-umpisa ang decontamination kahapon, Hulyo 14 kag magalawig tubtob subong, Huylo 15.
Suno kay Esler, mismo ang alcalde sang banwa nga si Mayor Gian Carlo F. Occeña ang nag-isyu sang Executive Order para makapatigayon sang pagtinlo sa eskwelahan partikular na ang mga area kun sa diin nagtinir ang nagkalalipo nga mga estudyante.
Pahayag ni Esler, kun makita nga safe na ang lugar, posible nga tugutan ang mga estudyante nga makabalik sa eskwelahan, buas Hulyo 16.
