JANIUAY, ILOILO – Ginkumpirma sang Janiuay Municipal Police Station nga napatay ang team leader sang reconnaisance company sang Regional Mobile Force Batallion sa engkwentro nga natabo kagab-i sa Zone 7 Barangay Aglobong, Janiuay, Iloilo sa tunga sang rebelde nga grupo kag tropa sang gobyerno.
Sa interview sang Bombo Radyo kay Pol. Capt. Dadje Delima, hepe sang Janiuay Municipal Station, iya ginpahayag nga ang napatay amo si Pol. Capt. Efren Espanto, 29 anyos, tumandok sang La Carlota, Negros Occidental.
Suno kay Delima, posible nga gin-ambush ang tropa sang gobyerno bangud natigayon gid nga mapatay si Espanto.
Isa lamang ang nakit-an nga igo sang bala sang armas sa lawas sang biktima nga nagsentro sa iya natuo nga bahin sang mata.
Pahayag niya, ang Igabon Platoon, Central Front Kilusang Rehiyon Panay amo ang responsable sa kamatayon sang nasambit nga pulis.
Ginahanda naman sang kapulisan ang mga documentary evidence agud nga mapasakaan kaso ang rebelde nga grupo.
Sa subong, nagahulat na lang sang mandu si Delima halin sa Iloilo Police Provincial Office kag Police Regional Office 6 kun ano ang ila mangin masunod nga lihog matapos mapatay ang ila kaupod sa hanay sang Philippine National Police.
Ginakasubo sang Philippine National Police ang natabo nga pagkapatay sang ila kaupod matapos matiruhan sang rebelde nga grupo sa natabo nga engkwentro sa Zone 7 Barangay Aglobong, Janiuay, Iloilo.
Ang biktima amo si Pol. Capt. Efren Espanto, 29 anyos kag team leader sang reconnaisance company sang Regional Mobile Force Batallion.
Sa interview sang Bombo Radyo kay Pol. Capt. Janvier Gilza, Acting Chief of Police sang San Remigio, Antique Municipal Police Station, iya ginpahayag nga si Espanto ang iya ginbuslan bilang hepe sa San Remigio antes ini gin-assign sa Regional Mobile Force Batallion.
Suno kay Gilza, si Espanto ang sahi sang pulis nga “snappy”, dedikado kag tuman ang “passion” sa trabaho.
Magluwas sa mga nasambit, mabuot man kag maayo nga tawo ang biktima.
