Temprano pa nga nagpauli ang defending champion sa US Open nga si Novak Djokovic matapos ini gin-upset sang No. 28 seed nga si Alexei Popyrin sa third round sang tournament.
6-4, 6-4, 2-6, 6-4 ang skor nga amo ang nagtapos sa kampanya sang Serbian tennis superstar nga makuha kuntani ang iya ika-25 nga Grand Slam title.
Ang kalutusan ni Djokovic nga amo ang gold medalist sa bag-o lang nagtakop nga Paris Olympics amo naman ang naghatag-duag sa karera sang Australian sini nga kasumpong nga nakabulsa sang pinakadaku nga kadalag-an sa iya tennis career sang nalab-ot sini ang round of 16 sang isa ka major tournament sa labing-una nga tion.
Gin-ako ni Djokovic nga ginkapoy siya sa mental kag pisikal nga aspeto sa iya kumpetisyon sa Paris rason man kun ngaa pigado ang iya performance sa New York.
“I spent a lot of energy winning the gold, and I did arrive to New York just not feeling fresh mentally and physically,” pahayag sini. “But because it’s US Open, I gave it a shot and I tried my best. I didn’t have any physical issues. I just felt out of gas and you could see that with the way I played.”
Antes kay Djokovic, temprano man nga nalutos ang isa ka heavy favorite nga si Carlos Alcaraz sang Espanya. Ginpierde si Alcaraz sang unseeded player nga si Botic Van de Zandschulp.
Ang pag-upset sa Serbian kag Spaniard players amo ang nagbutang sa top seed nga si Jannik Sinner bilang isahanon na lamang nga paborito nga makadaog sa US Open title matapos man ini nagpangibabaw sa 2024 Australian Open.
Ang 2024 US Open amo ang labing-una nga tion sa Grand Slam nga wala sang makit-an nga Djokovic, Rafael Nadal ukon Roger Federer sa Round of 16 halin sang 2004 French Open — tion nga naga-edad pa lang si Djokovic sang 17-anyos.
