Buhi pa ang paglaum sang defending champions nga France nga makahimo sang maragtas bilang ikatatlo nga pungsod sa bilog nga kalibutan nga makaangkon sang back-to-back win sa FIFA World Cup kasunod sa rekord sang Italya kag Brazil.
Ini matapos nga ginlutos sang France ang Morocco sa semi-finals sa Qatar, 2-0.
Ang una nga naka-skor para sa national team amo si Theo Hernandez sa ika-singko nga minuto sang hampang. Ini man ang una nga goal sang 25-anyos nga si Theo sa World Cup 2022. Magluwas sa iya una nga goal, may nakolekta man ini nga duha ka assists sa sini nga tournament.
Sa second half, ginsundan ini sa goal nga nahimo sang substitute nga si Randal Kolo Muani sa ika-79 nga minuto.
Sa Domingo,11:00 sa gab-i oras sa Pilipinas, balantayan ang showdown sang Paris Saint Germain teammates nga si Lionel Messi nga amo ang magapanguna sa Argentina kag Kylian Mbappe nga isa man sa ginapabugal sang France.
Gutom sa kampyeonato ang Argentina ilabi na bangud ini na ang ginalauman nga finals nga makahatag sang una nga World Cup win sa decorated career ni Messi nga natalana naman nga mag-retiro sa football.
Samtang, kun magdaog naman ang France, ini ang ikatatlo nga team sa maragtas sang World Cup nga makahimo sang back-to-back win. Ang una nga nakahimo sini nga rekord amo ang Italya (1930 kag 1934) kag ang Brazil (1958 kag 1962).
Pareho man nga contenders sanday Mbappe kag Messi sa Golden Boot — ang award nga ginahatag sa player nga makahimo sang pinakadamo nga goals sa World Cup. Sa subong, pareho nga may lima ka goals sanday Messi kag Mbappe. Nagasunod sa Golden Boot race amo sanday Olivier Giroud sang France kag Julián Álvarez sang Argentina nga may tag-apat ka mga goal. ##
