Napilitan nga magpanaog sa trono ang reigning champions nga Espanya matapos ginlutos sang Canada, 88-85, sa makahalawat-hawat nga second round sang FIBA World Cup 2023 sa Indonesia Arena sa Jakarta.
Nagtingob-pwersa ang NBA stars nga sanday Dillon Brooks sang Houston Rockets kag Shai Gilgeous-Alexander sang Oklahoma City Thunder agud nga kuhaan sang korona ang defending champions sa do-or-die game sa Group L showdown.
Sa first half sang hampang, halos isa ka tikang na lang kag makalab-ot ang Espanya sa knockout phase bangud sa 10 nga abanse sa Canadians, 48-38.
Pagkatapos sang third quarter, nasimhutan na sang Spanish players ang kadalag-an, 73-61, apang sang duha ka minutos na lang ang nabilin sa sambuwa, naglain ang dalagan sang puntos.
Nagpasulod sang tres si Gilgeous-Alexander nga nagpanubo sang lead sang Espanya, 78-77. Nagsaka sa tres puntos ang abanse sang Spain paagi sa duha ka free throws ni Willy Hernangomez, apang nag-assist liwat si Gilgeous-Alexander para makapasulod si Brooks sang tres nga amo ang nagpa-patas sa skor sang 1:19 minuto na lamang ang nabilin sa oras.
44 segundos ang nabilin sa fourth quarter sang naghilinugyaw ang tanan sa step-back jumper ni Gilgeous-Alexander nga amo ang naghatag sa Canada sa ila labing-una nga abanse sa second half, 82-80.
May duha pa free throws si Gilgeous-Alexander, kag 15 segundos ang nabilin sang nagdugang sang duha ka puntos ang Espanya.
13 ka segundos ang nabilin sa match-up sang duha ka free throws ang ginbuy-an ni Gilgeous-Alexander para mapasaka ang lead sang Canada, 86-82.
Lima ka segundos ang nabilin, daw indi na makalantaw ang players sa bench bangud nagdugang pa sang tres puntos ang Spain paagi kay Santiago Aldama rason nga isa na lang ang abanse sang Canada.
Sang 4.5 segundos ang nabilin sa hampang, na-foul si Gilgeous-Alexander kag nakapasulod sang duha ka free throws para sa Canadians.
Nagtuyo pa nga makapasulod sang tres si Alex Abrines para sa Espanya apang nag-igu lamang sa ring, nag-expire ang time kag naghilinugyaw ang Canadian fans sa Arena.
Nagpanguna si Gilgeous-Alexander sa Canadians nga may 30 points sa 7-of-12 shooting kag may seven assists. Si Brooks naman ang may yara sang 22 points, samtang si RJ Barrett ang may yara sang 16 puntos
3-2 ang rekord sang Spain sa Group L kag amo ini ang labing-una nga tion nga wala sila nakasulod sa quarterfinals sa World Cup halin sang 1994.
Tanan nga Top 4 teams sa nagligad nga World Cup ang napaslawan man nga maka-abanse sa Final Phase: wala nakasulod sa tournament ang runner-up nga Argentina, nabilin sa classification round ang bronze-medalist nga France, samtang nalutos naman sa second round sa kamot sang Slovenia ang fourth placer nga Australia.
Kumpleto naman subong ang maga-sambuwa sa final phase nga ginalakipan sang Italy, Serbia, USA, Lithuania, Germany, Slovenia, kag ang debutant nga Latvia. #
