Maga-atubangay ang reigning European champions nga Espanya kag ang defending world champions nga Argentina sa final match sang FIFA World Cup 2026!
Ini matapos nakuha sang Argentina ang isa pa ka spot para sa finals matapos ginlutos ang England sa semifinals nga nagtakop 5:00 subong nga kaagahon oras diri sa Pilipinas.
Nahimo sang Argentina ang kadalag-an paagi sa duha ka comeback goals, 2-1.
Ang una nga naghugyaw sa Mercedes-Benz Stadium amo ang fans sang England matapos nga naka-goal si Anthony Gordon sa 55th minute.
Sa sulod sang 30 minutos, nangin daku nga bulig para sa team nanday Harry Kane kag Jude Bellingham ang duha ka crucial saves ukon pagpangsagang sang ila nga goalkeeper nga si Jordan Pickford nga rason nga wala nakasulod ang duha ka goals kuntani nanday Nico Gonzalez kag Alexis Mac Allister.
Nakabalos na gid man ang Argentina sang naka-goal si Enzo Fernandez sa ika-85 nga minuto nga amo ang nagbuhi sang tyansa sang defending champs.
Ginpasulod man bilang substitute si Lautaro Martinez nga amo ang naghatag sang ikaduha nga goal para sa Argentina sa second minute sa stoppage time nga amo ang nagselyo sang kadalag-an sang team.
Pareho nga ang 39-anyos nga captain kag superstar nga si Lionel Messi ang nag-assist para nga maka-goal ang duha sa iya teammates.
Bangud sa duha ka assists subong nga adlaw, naglab-ot sa kabilugan nga 12 ka assists na ang nahimo ni Messi sa FIFA World Cup matches kun sa diin 10 ang nahimo sini sa knockout rounds.
Si Messi man ang una nga player halin sang 1966 nga nakahimo sang duha ka assists sa isa lang ka hampang.
Balantayan ang finals sa tunga sang Argentina kag Spain sa East Rutherford, New Jersey alas tres sa kaagahon sa Lunes, Hulyo 20, oras diri sa Pilipinas.
Ini ang una nga tion nga tion nga magaatubangay sa final match ang reigning champions sang Europe kag ang reigning champions sang South America.
Ini man ang una nga tion nga ang top two teams sa FIFA rankings ang magasambuwa sa final halin sang gin-umpisahan ang rankings sang 1992.
Atubangon naman sang England ang France nga ginapangunahan ni Kylian Mbappe para sa battle for third.
Suno kay Bombo International Correspondent Ramil Isogon direkta sa United Kingdom, naghuyhoy man ang pako sang English fans matapos ang game subong sa semifinals.
Apisar sini, buhi ang ila paglaum nga makabawi sa masunod nga hampang batok sa France.
