Nasawayan sa impeachment court ang isa sa mga defense lawyers matapos ginpadayaw sini kadungan sang cross-examination sa witness ang bar rating ni Vice President Sara Duterte.
Natabo ini samtang ginapisa-pisa sang pamangkot ni Atty. Mark Vinluan si National Bureau of Investigation ukon NBI Bangsamoro Regional Director Jeremy Lotoc nga isa man ka abogado.
Si Lotoc amo ang nagpanguna anay sa imbestigasyon sa NBI sa pahayag ni Duterte nga nakakontrata na siya sang tawo agud nga kun mapatay siya, patyon man si President Bongbong Marcos, ang first lady, kag ang former house speaker.
Ginmensyonar ni Vinluan ang background ni Duterte sa abogasya sang ginakwestyon sini si Lotoc nga kun seryoso si Duterte sa iya plano batok sa president, isapubliko bala sini ang amo nga plano.
Sunod nga ginpamangkot ni Vinluan kun nakahibalo bala si Lotoc nga abogado si Duterte nga nakapasar sa Bar Examination sa iya una nga pagkuha sang pasinawan.
Pahayag pa sini, nakakuha ang vice president sang 80 porsyento nga marka nga mataas sa grado sang kadam-an nga mga abogado nga yara didto sa sulod sang impeachment court.
“[She did it] with a first attempt and with a rating of 80%. Are you aware of this? She has a higher grade than most of the lawyers here. But are you aware that she also worked as a court attorney?,” suno pa kay Viluan.
Gilayon nga nag-object si prosecution counsel Atty. Amado Virgil Ligutan kag gin-raise ang “relevance” sang komento sang defense lawyer.
Diri na kag nagsal-ot si Presiding Officer Francis “Chiz” Escudero nga isa man ka abogado.
Ginpahayag sini nga dapat likawan ang mga pahayag bangud wala man gani nakahibalo si Vinluan kun pila ang ratings sang iban nga abogado nga yara sa impeachment court.
“Objection relevant. Also, …. kindly avoid those disparaging statements given that there are a lot of lawyers here and you don’t know what their grades are,” suno kay Escudero.
Nagpasalig naman si Vinluan nga tumanon nila ang direktiba sang impeachment court.
