Nagpangabay si Atty. Mark Vinluan nga kakason sa official record sang Senate Impeachment Court ang komento ni House private prosecutor Mae Divinagracia nga gintawag sang defense nga “unprofessional.”
Natabo ini samtang ginapamangkot ni Atty. Divinagracia ang witness nga si Anti-Money Laundering Council (AMLC) Executive Director Atty. Ronel Buenaventura kaangot sa cash withdrawal nga natabo sang December 20.
Ginpamangkot ni Divinagracia ang witness kon pila ka adlaw ang tunga sang amo nga withdrawal kag December 31 nga iya una gintawag nga katapusan nga adlaw sang pag-file sang Statement of Assets, Liabilities and Net Worth ukon SALN.
Ginklaro naman ni Presiding Officer Francis Escudero nga indi December 31 ang deadline sa pag-file sang SALN kundi amo ang cutoff date sang mga transaksyon kag assets nga ma-reflect sa SALN nga i-file sa masunod nga tuig.
Sang ginpasabat na ang witness, nagsiling ini nga 11 ka adlaw ang tunga sang December 20 kag December 31, kag nagkomento si Divinagracia nga daw kaangay lang sa confidential funds.
“Kung from December 31 to December 20, that’s about 11 days po, your honor,” suno kay Buenaventura. “11 days, parang po pala ‘yung sa confidential funds.”
Sa manifestation ni Vinluan, nagsiling ini nga “snide remark” ang komento sang prosekuyon kag nagdugang pa nga ang impeachment trial indi lugar para sa ginatawag niya nga “barbershop talk.”
Nagpangabay si Vinluan nga kuhaon ang amo nga mga komento sa official record agud mapreserbar ang integridad sang impeachment proceedings.
“For the record, your honor, with all due respect to Atty. Mae, she made snide remarks regarding 11 days which we deemed highly improper, your honor. This is not a barbershop talk, these are unprofessional remarks, your honor. We just want to maintain the integrity of this proceedings and they keep on repeating so we just want these snide remarks to be stricken off the record,” pag-object ni Vinluan.
Gintugutan naman ni Escudero ang request sang defense apang ginmandu nga kuhaon man sa record pati ang komento ni Vinluan nga “barbershop” kag “snide” remarks.
“The chair will strike off the remarks of Atty. Mae also the references or statements making reference to barbershop or the word snide. Both would be stricken off the record,” suno kay Escudero.#
