Ginpanginwala sang defense team ni Vice President Sara Duterte nga ila ginatudluan ukon gina-coach ang mga testigo kon ano ang dapat isabat antes magtestigo ang mga ini sa impeachment trial.
Suno kay Defense Spokesperson Atty. Michael Poa, limitado lamang sa scope ukon sakop sang testimonya ang ila komunikasyon sa mga testigo agud malikawan ang alegasyon sang witness tampering ukon pagpanghilabot sa testimonya.
Pahayag pa ni Atty. Poa nga wala sila sang ihibalo nga ang ila testigo nga si Davao City Accountant Vingelin Bajan, ang anay partner sang isa ka accounting firm nga nag-audit sa tatlo ka kompanya nga may kaangtanan sa mga Duterte.
Matandaan nga sa nangin cross-examination ni Private Prosecutor Atty. Mae Divinagracia kay Bajan kahapon nga adlaw, ginpahayag ni Bajan nga wala sini nadumduman ang iya koneksyon sa nasambit nga mga accounting firm.
Ginpahayag man ni Atty. Poa nga man sila sang may nakita nga rason nga bag-uhon ang ila pamaagi sa pagpresentar sang mga testigo, bisan gin-usisa sang pila ka senador-judge ang credibility kag posible nga conflict of interest sang mga ini.
Dugang pa ni Poa, dapat magpabilin ang focus sa mga dokumento kag ebidensya nga ginapresentar sang depensa.
Apang, ginakabig man nga kabahin sang cross-examination ang pag-usisa sa posible nga bias ukon conflict of interest sang mga testigo, kag ang mga senador-judge na ang magadesisyon kon may epekto ini sa ila testimonya kag sa mga ebidensya nga ginpresentar.
