Nagpasugot si Defense spokesperson Atty. Michael Poa sa panawagan ni Rep. Terry Ridon nga dapat patas ang pagpatuman sang sub judice rule kasunod sang stern warning sang impeachment court sa mamalidha.
Ini matapos ginapanawagan ni Ridon nga dapat man ikonsiderar ang mga ginapahayag ni Vice President Sara Duterte, lakip na ang pagtawag niya nga “Sarsuela” ang impeachment proceedings.
Suno kay Poa, handa ang defense team nga atubangon ini kon mangin isyu sa impeachment court ang bisan ano nga pahayag sang Bise Presidente.
Gindugang ni Poa nga pabor sila sa fairness kag dapat man siya singganan kon makapahayag sang indi husto nga pahayag.
Suno pa sa iya, nahibaluan ni Vice President Sara Duterte, nga isa man ka abogado, ang sub judice rule, kag naistoryahan na nila ini sang una.
Samtang, ginkumpirma ni Counsel for the Public Prosecutors Atty. Benjamin Tolosa Jr. nga nabaton na niya ang desisyon sang Senate Impeachment Court natuhoy sa iya gin-alegar nga paglapas sa sub judice ruling.
Suno kay Tolosa, admonition ang gindagdag sa iya ni Presiding Officer Chiz Escudero, nga nagakahulugan nga ginsingganan ini ukon ginsaway ini bangod sa iya mga pahayag.
Suno kay Tolosa, ginarespeto nila ang desisyon sang impeachment court kag nagpangako nga mangin mahinalungon na ini sa iya mga statement sa masunod.
Apang padayon ang iya panawagan nga dapat patas ang pagpatuman sang sub judice rule sa tanan, ilabi na kay Vice President Sara Duterte, bangod sa iya mga pahayag nga, suno kay Tolosa, naga-atake sa integridad sang korte.
