ILOILO CITY- Ginpagwa na sang Police Regional Office 6 ang tatlo ka mga pangalan nga pilian ni Governor Arthur Defensor Jr. agud mangin masunod nga director sang Iloilo Police Provincial Office.
Ini nga mga pangalan nga ginpadala na sa opisina sang gobernador ang ginalakipan nanday Colonel Bayani Razalan, Colonel Giovanni Musico, kag Colonel Ferdinand Navales.
Si Razalan ang nagapungko subong bilang Officer in Charge sang Iloilo Police Provincial Office.
Si Colonel Musico amo subong ang pinuno sang Regional Intelligence Division (RID).
Si Colonel Ferdinand Navales naman ang nagapamuno sang Regional Headquarters Support Group (RHSG).
Suno kay Police Brigadier General Jack Wanky, director sang PRO-6, nagpasa sila sang listahan kay Defensor matapos nga wala nakapasa ang Camp Crame.
Sa interview naman sang Bombo Radyo kay Defensor, iya ginpahayag nga ginpapasa anay niya sang resume’ ang tatlo ka mga pulis agud makita kag mahibaluan ang ila credentials.
Suno sa gobernador, magapatigayon man siya sang kaugalingon nga validation kag background check sa amo nga mga police officials.
