Magasapol si Iloilo Governor Arthur Defensor, Jr. sa national government agencies subong nga semana agud hambalan ang sitwasyon sa probinsya nga nagakalubog sa tubig-baha sa tion nga magbubo ang mamunog nga ulan.
Si Defensor, chairman sang Provincial Disaster Risk Reduction and Management Council (PDRRMC), ang magapakig-istorya sa concerned agencies kaangay sang Department of Environment and Natural Resources (DENR) kag Office of Civil Defense (OCD) paagi sa disaster and environment cluster meeting.
Sa interview sang Bombo Radyo kay Defensor, iya ginpahayag nga lakip sa hambalan amo ang disaster plan sang probinsya ukon kun may kinahanglan pa i-adjust sa plano kun may naglain sa danger zones.
May mga kabukiran ilabi na sa Northern Iloilo kun sa diin lunsay na mais ang natanum sa baylo nga kahoy.
Mas maayo suno kay Defensor kun may bulig ang government agencies sa pag-analisar sang matuod nga problema.
Gin-athag sang gobernador nga may yara sang reforestation program ang Iloilo Provincial Government, corn terracing, kag iban pa nga existing programs apang kalabanan sa sini ang ginagamitan sang long-term approach.
Madumduman nga sang naglaslas ang Bagyo Agaton, labi nga apektado ang mga banwa sa Quinto Distrito kun sa diin may mga barangay pa nga tubtub na sa atop sang balay ang kataason sang tubig-baha.
