Wala sang may bag-uhon si Iloilo Governor Arthur Defensor Jr. sa pagsulundan sang Iloilo Province sa tion nga palawigon ang Modified Enhanced Community Quarantine (MECQ) status sa probinsya umpisa Septyembre 1 – 7, 2021.
Sa interview sang Bombo Radyo kay Iloilo Governor Arthur Defensor Jr. iya ginpahayag nga, padayunon sa gihapon ang ginapatuman nga Barangay Quarantine tubtob Septymbre 7 sa idalom sang Executive Order 320.
Bangud man sa nagasaka nga COVID-19 cases sa probinsya, ginahingyo sang gobernador ang publiko nga indi magkakapoy sa pagsunod sa istrikto nga health protocols kaangay sang pagpanghinaw, pagmaskara kag pagsuksok sang face shield.
Yari naman ang pagsulundan sa Iloilo Province sa idalom sang MECQ:
*Pahanugutan lamang ang take out kag delivery services sa tanan nga restaurant kag iban pa nga public dining;
*Ginadumilian ang operasyon sang bars, theaters, cinemas, internet cafes, amusement arcades kag playgrounds;
- Ginadumilian ang tanan nga contact sports kag game activities;
- Ginadumilian ang operasyon sang tanan nga personal care services kaangay sang barber shops, beauty parlors, cosmetic ukon derma clinics kag massage therapy kalakip na ang home service sang mga nasambit nga aktibidad;
- Ginadumilian ang operasyon sang fitness studios, gym kag spa;
- Ginapahanugutan ang outdoor sports apang sa gwa lamang sang balay ukon outside residence;
- Ginadumilian ang pabulang kag iban pa nga gaming establishments;
- Wala sang border control; indi na kinahanglan pa ang travel pass sa pagwa kag pasulod sa probinsya;
- Wala sang liquor ban;
- Ginapahanugutan ang religious gathering sa 30% capacity;
- Ginalimitahan sa lima ka-adlaw ang pagpatigayon sang haya sa diin ang immediate family lamang ang ginapahanugutan nga magtambong pati na sa lubong;
- Bukas ang resorts kag recreational venues para lamang sa mga returning overseas Filipinos nga i-quarantine apang siraduhon ang recreational facilities;
- Ginapatuman ang curfew umpisa 9 sa gab-i tubtub 4 sa kaagahon; kag
- Ginadumilian ang tanan nga public events kag gatherings kaangay sang fiesta, festivals, birthday, anniversary, wedding, baptismal celebrations kag receptions
