Nagahatag sang kabudlayan sa publiko ang pagka-delay sang proyekto sa dalan sa Barangay Rizal, Lapuz Sur, Iloilo City.
Sa interview sang Bombo Radyo kay Punong Barangay Wilson Allona, iya ginpahayag nga ginabanta siyam na ka bulan nga gina-obra ang proyekto apang tuman kahinay ini kun matapos.
Suno pa sa iya nga tungod sa delay nga pagtapos sang proyekto, nagahatag na ini sang perwisyo sa mga residente nga nagagamit sa dalan.
Nagpatigayon na sila sang coordination meeting sang September 16 upod sa mga representante sang Metro Pacific Iloilo Water kag contractor agud talakayon ang pagpatuman sang proyekto.
Suno pa sa iya nga kinahanglan sang koordinasyon sa tunga sang Department of Public Works and Hihgways, Metro Pacific Iloilo Water kag contractor para sa joint excavation agud mahimo na gilayon ang pag-ayo sang mga parte sang pipeline kag waterlines.
Nagapanawagan naman si Allona sa mga nagapatuman sang nasambit nga proyekto nga tutukan kag kompletuhon na ini agud gilayon na nga matapos.
