ILOILO CITY – Ginsuguran na sang advance party sang Negros Occidental nga nagapasakop sa Western Visayas Regional Athletic Association (WVRAA) Meet, ang pagpatahom sang ila billeting area nga La Paz 1 Elementary School diri sa siyudad sang Iloilo.
Gintamnan sang bulak ang buluthuan samtang nagdala man ang mga ini sang buhi nga tanom gikan pa sa Negros.
Sa interview sang Bombo Radyo, ginpahayag ni Ermie Miranda, head sang transportation, accommodation and communication committee sang Negros Occidental delegation, luyag nila nga depensahan ang ila titulo bilang clean and green champion sang sila ang nagapasakop pa sa WVRAA Meet.
Suno kay Miranda, may yara sang clean and green committee nga amo ang in-charge sa pagpatahom sang ila billeting area.
Kada regional meet suno kay Miranda, ginatsekyar man ang waste management, katinlo kag sanitation sang tagsa ka mga billeting areas.
Sa Pebrero 15, maabot ang delegasyon sang Negros Occidental nga ginabug-usan sang 658 ka mga atleta, coaches kag delegation officials.