Umpisahan na sang Kamara subong nga adlaw, Agosto 5, ang deliberasyon sang ginaduso nga P6.352-trillion national expenditure program (NEP) sang Marcos Jr. administration para sa 2025.
Una nga maga-atubang sa House committee on appropriations amo ang economic team nga ginabug-usan sang Development Budget Coordination Committee (DBCC) – ang Department of Budget and Management, National Economic and Development Authority, Department of Finance kag Bangko Sentral ng Pilipinas.
Suno kay committee vice chair Marikina City Rep. Stella Luz Quimbo, unahon nila ang presentasyon sang DBCC agud matumod ang macroeconomic assumptions nga gingamit sa pagpasad sang budget nga gin-presentar sa Kongreso, ang ginhalinan sang pondo, kag kun ano ang prayoridad nga galastuhan.
Sa idalom sang proposed 2025 national budget, ang sektor sang edukasyon amo ang nagapabilin nga top priority nga nakakuha sang P977 billion nga mas mataas sa proposed P968 billion sang 2024.
Ini nga proposal ang naga-cover sang pondo para sa Department of Education, state colleges and universities, Commission on Higher Education kag Technical Education and Skills Development Authority.
Nagasunod sa education sector amo ang Department of Public Works and Highways nga may P900 billion sa 2025.
Nagasunod amo ang health sector lakip na ang iya sang Philippine Health Insurance Corp. nga may P297.6 billion, mas manubo sa P308.3 billion sang 2024.
May yara naman sang P278.4 billion sa Department of the Interior and Local Government samtang sa Department of National Defense, may ginaduso nga pondo nga P256.1 billion.
Ang iban pa nga priority sectors amo ang Department of Social Welfare and Development nga may P230.1 billion, Department of Agriculture kag attached corporations nga may P211.3 billion, Department of Transportation nga may P180.9 billion, judiciary nga may P63.6 billion kag Department of Justice nga may P40.6 billion.
Ang P6.352-trillion NEP para sa 2025 ang mas mataas sang 10.1 percent ipaanggid sa national budget subong nga tuig.
