AREVALO, ILOILO CITY – Nakuhaan sang masobra P1 million nga balor sang iligal nga droga ang isa ka delivery boy sang isa ka catering services sa drug buy bust operation sa Brgy Sto Niño Norte, Arevalo, Iloilo City.
Ini amo si Michael Gullo, alias “Michael”, 50, kasado, residente sang Guance Street Brgy. Bonifacio, Arevalo, Iloilo City kag High Value Individual.
Sa interview sang Bombo Radyo kay Police Captain Ryan Chris Inot, team leader sang Regional Drug Enforcement Unit 6, iya ginpahayag nga nakuha sa posisyon ni Gullo ang 220 grams sang suspected shabu.
Suno kay Inot, nag-report ang mga staff sang lodging house nga masami nga nagapadulong sa ila lugar ang subject sa diin lain-lain nga tawo ang gina-upod sini.
Sang nagpatigayon sang operasyon, nabaklan si Gullo sang police poseur buyer sang isa ka sachet sang suspected shabu balor P15,000.00 bilang buybust money.
Sa subong, preso na ini sa Arevalo Police Station kag nagapangatubang sang kaso nga paglapas sa Republic Act No. 9165 ukon Comprehensive Dangerous Drugs Act of 2002.
