ILOILO CITY- Patay ang isa ka delivery boy matapos ginluthang sang isa ka gwardiya sa kilid sang Robinson’s Place- Main, corner Quezon kag J. De Leon Streets, Iloilo City Proper.
Ang suspek amo si Argie Solis, residente sang Laua-an, Antique kag gwardiya sang Malayan Bank sa Quezon Street samtang ang biktima amo si Joemar Sanchez, residente sang Brgy. Bitoon, Jaro, Iloilo City kag delivery boy sang Food Panda.
Ginapahayag nga nagbaisay ang gwardiya kag ang delivery boy matapos nga ginsita sang suspek ang biktima bangod sa pagtungtong niya sang iya i-deliver nga pagkaon sa desk sa pwertahan sang Malayan Bank.
Sa interview sang Bombo Radyo kay alyas Boy, testigo sa shooting incident, iya ginpahayag nga sa una nga pagtiro sang suspek sa biktima, duha ka beses niya ini nga ginpalukpan.
Suno kay alyas Boy, sang nagdalagan ang biktima, gintiro ini liwat sang suspek tubtob nga natumba ang delivery boy.
Pahayag niya, isa ka metro lang ang antad sang gwardiya sa biktima.
Sang natumba na ini, gintuyo pa gid nga palukpan sang suspek ang biktima apang naubusan na ini sang bala rason nga nagbalik ini sa sulod sang bangko kag ginkuha ang iya bag kag nagpalagyo.
Patal nga igo sa dughan naman ang naangkon sang biktima nga gintunaan sang iya kamatayon.
