Ginluthang-patay sang isa ka Barangay Tanod ang delivery boy sang tubig sa Brgy. Bolilao, Dumangas, Iloilo.
Ang biktima amo si Junel Caspillo Diel, 32-anyos, may live in partner, delivery boy sang isa ka water refilling station kag residente sang People’s Village, Barangay PD Monfort North, Dumangas, Iloilo.
Samtang, ang suspek naman amo si Barangay Tanod Cirelo Defiño Sobrevega.
Sa interview sang Bombo Radyo kay Police Master Sergeant John Mark Tuazon, imbestigador sang Dumangas Municipal Police Station, iya ginpahayag nga nagpadulong sa amo nga barangay ang biktima kaupod ang iya upod nga delivery boy sa amo nga barangay agud magkuha kuntani sang mga gallon agud i-refill sang tubig.
Sa tion sang ila pagpabalik, nasumalang nila ang barangay tanod nga nagasakay sa iya motorsiklo, ginpaypayan niya ang biktima kag ginpadulong sa higad sang dalan.
Samtang nagapalapit ang biktima sa suspek, nagpaguwa na sang armas ang suspek kag ginpamangkot ang biktima kon mabato ini sa iya, nagsabat man ang biktima nga indi siya magbato bangud may kabataan ini, apang hinali lang nga gintiro sang suspek kag na-igo sa iya dughan kag tiyan nga gintunaan sang iya kamatayon.
Suno kay Tuazon, antes pa man ini matabo, may kinagamo sa amo nga barangay sa balay sang ka live in partner sang biktima sang Abril 20, kun sa diin na-involve diri ang biktima.
Sa amo nga tion, nagwatag sila sang mga barangay officials kag barangay tanod kon sa diin, lakip man ang suspek sa nagresponde, sa iya pag-abot, gulpi lang niya ginkuga sa likod ang biktima kag ginbalikid man sang biktima ang suspek kag ginsumbag.
Ini man ang rason nga gindala ini sa police station apang nag-aregloghanay man ang duwa.
Sa subong, padayon pa ang hot pursuit operation sang kapulisan agud matul-id kung din nagpanago ang suspek agud maaresto kag mapasakaan sang nagakaigo nga kaso.
