ILOILO CITY–Totally burned ang isa ka delivery truck sa bahin sang Brgy. Balabago, Jaro,  Iloilo City.
Sa interview sang Bombo Radyo kay Jeslyn Montaña, driver snag truck, iya ginpahayag nga appliances ang karga sang delivery truck kag igadeliver kuntani sa Bacolod City, Negros Occidental.
Ang karga sang delivery truck ang ginalakipan sang TV,  speakers kag iban pa nga mga electronic appliances.
Pahayag pa sang driver, iya ginkakibot nga nagkarab-karab na ang salakyan.
Ginapatihan naman sang driver nga short circuit sa sulod sang truck ang gintunaan sang sunog.
Nahibaluan nga naghalin sa Plaza Libertad sa syudad sang Iloilo ang delivery truck.
Samtang, natumod na sang Bureau of Fire Protection (BFP) ang rasun sa pagkasunog sang delivery truck.
Sa interview sang Bombo Radyo kay FO3 Denmark Macoco, imbestigador sang BFP, iya ginpahayag nga short circuit sa wire sang suga sa sulod sang closed van ang ginhalinan sang sunog.
Sunu kay Macoco, samtang naga drive si Jeslyn Montaño, nagaaso ang bahin sang truck kag gilayon niya nga ginlantaw ang unod sang salakyan.
Nakita na niya nga may kalayo nga nagatupok sa mga karga nga appliances.
Ginhingagaw pa sang driver nga salbaron ang mga karga apang wala natigayon bangud tuman na ang pagdabadaba sang kalayo.
Kapin P2 million ang balor sang mga appliances nga nasunog lakip na ang truck.