Nagwangal ang isa ka iloy nga una na nagpositibo sa COVID-19, ginpapauli sa ila balay matapos ang 21 ka-adlaw nga quarantine apang gilayon nga ginpabalik sa quarantine facility matapos natukiban nga COVID-19 Delta variant ang nag-igo sa iya.
Sa interview sang Bombo Radyo kay alyas Ana, residente sang syudad sang Iloilo, iya ginpahayag nga Agusto 2 sang una siya gin-quarantine matapos nagpositibo sa virus sa diin didto niya natukiban nga ginpadala ang iya specimen sa Philippine Genome Center bangud sa iya mataas nga viral load.
Kahapon, Agusto 23, nagwa ang resulta sang genome sequencing sa diin natumod nga nagpositibo sa COVID-19 Delta variant ang iloy.
Apang sang amo man nga adlaw natapos ang iya 21-days quarantine sa diin nakapauli na siya sa ila balay bag-o siya ginpahibalo nga i-quarantine liwat.
Pahayag ni Ana, indi niya mahangpan ang matuod nga protocol sang syudad sa pag-handle sang Delta patients sa diin dako ang iya kabalaka bangud mahimo nga na-close contact na niya ang iya mga kabataan.
Samtang, paathag naman sang COVID-19 Team sang Iloilo City Government, ginakabig nga active case sang COVID-19 ang mga pasyente nga natumod positibo sa COVID-19 Delta variant.
Sa interview sang Bombo Radyo kay Mr. Jeck Conlu, spokesperson sang COVID-19 Team sang syudad, iya ginpahayag nga gilayon nga ginapaidalom sa reverse transcription polymerase chain reaction (RT-PCR) test ang mga Delta patients lakip na ang ila close contacts.
I-quarantine sa sulod sang 14 ka-adlaw ang mga index case kag 5-10 days naman ang ila mga close contact.
Pahayag ni Conlu, madugay mag-abot kag indi mapaktan ang petsa sang paggwa sang resulta sang genome sequencing nagikan sa Philippine Genome Center rason nga antes matukiban kun ano nga variant sang COVID-19 ang nagtapik sa isa ka indibidwal, recovered na ini sa balatian.
Apang wala naga-kampante ang syudad rason nga mas ginapahugtan sa gihapon ang protocols kag liwat nga gina-swab test ang mga pasyente nga may history sang COVID-19 Delta variant.
