Ginpatigayon sang Iloilo City Government ang demolisyon sang 30 ka temporary stalls sa fish section sang Rizal Street bilang kabahin sang preparasyon para sa soft opening sang bag-o nga Terminal Market sa Oktubre 20.
Sa interview sang Bombo Radyo kay Efren Tuvilla, presidente sang mga nagabaligya sang isda sa merkado, suno sa iya:
Ang demolisyon sang mga stalls nagsugod sang Oktubre 14, kag ginpang-kakas ang mga atop kag istruktura agud mapreparar ang lugar para sa pagbukas sang merkado.
Ginpahayag ni Tuvilla nga wala sang reklamo halin sa mga vendors bangud ginakabig nila nga ini para man sa ila kaayuhan.
May pila ka mga vendors nga wala pa sang temporaryo nga masayluhan, apang ginbaton nila nga kabahin ini sang proseso para sa mas organisado nga pagplastar sang merkado.
Ginpasugtan sang Local Economic Enterprise Office nga magbaligya ang mga vendors sa side area halin las-12 sang tungang gab-i tubtob las-8 sang aga, samtang wala pa sang hapon nga baligyaanay.
Wala sang pagsira sang dalan, pero magapangayo sang bulig sang Traffic Technical Management Office para sa pagdeleher sang trapiko.
Dugang pa, igademolish man ang 20 ka stalls sa De Leon Street sa Oktubre 16, kag ang mga apektado nga vendors igasaylo sa Jalandoni Street.
Ang soft opening sang Terminal Market nakatalana sa Oktubre 20, samtang ang grand opening naman sa Oktubre 30.
