ILOILO CITY – Gin-athag sang Iloilo City Health Office nga wala pa nalab-ot sang syudad ang alert ukon epidemic thresholds sa dengue.
Sa interview sang Bombo Radyo kay Dr. Jan Reygine Hortinela, Medical Officer III sang Iloilo City Epidemiology and Surveillance Unit (ICESU) sang Iloilo City Health Office, iya ginpahayag nga nagnubo sang 23% ang dengue cases subong nga tuig sa syudad kun ipaanggid sa kaangay nga period sang 2023.
Nahibaluan nga humalin sang Enero 1 tubtob Agusto 3 subong nga tuig, nagdangat na sa 366 ang narekord nga dengue cases sa syudad.
Sa nasambit nga numero ang Arevalo ang may pinakamataas nga kaso nga nagdangat sa 93, ginasundan sang Jaro 2 nga may 57 kag Jaro 1 ang may 51.
Nagdangat naman sa duha ang napatay bangud sa dengue.
Ginpasigurado man sang natungdan nga nagahimo sila sang pamaagi agud indi na madugangan pa ang kaso sang dengue sa syudad kaangay na lang sang misting, larviciding, kag public education.
