Tig-ululan na naman kag tion ini sang pagduging sang mga lamok nga may dala nga Dengue virus.
Ang nasambit nga virus ang dala sang mga lamok nga Aedes aegypti kag Aedes albopictus.
Sa interview sang Bombo Radyo kay Dr. Jubal Abellar, Chair sang Philippine Pediatric Society – Western Visayas Dengue Task Force , iya ginpahayag nga ang mga nasambit nga mga lamok ang nagakinahanglan sang dugo sa iya nga pagpangitlog rason nga ginakagat sini ang panit sang tawo.
Suno kay Abellar, ang duha ka mga lamok ang nagaguwa “early morning” kag “late afternoon”.
Dugang pa niya, masami nga ginatiniran sang mga lamok amo ang mga containers nga may unod nga tubig.
Samtang suno naman kay Dr. Eda Marie Hubo-Amoyot, pediatric infectious disease specialist kag myembro man sang Dengue Task Force, ang mga sintomas sang Dengue Hemorrhagic Fever amo ang pagbalik-balik sang hilanat sa sulod sang duha tubtob pito ka adlaw, tuman nga pagpalanakit sang ulo, muscle pain, nausea kag skin rashes.
Importante pahayag sang doktor nga hulaon ang tubig sa container nga mahimo mangin breeding sites sang lamok.
Una na nga ginpahayag sang Department of Health (DOH) nga padayunon ang 4-S campaign nga amo ang Search and destroy mosquito-breeding sites, secure Self-protection measures, Seek early consultation, kag Support fogging/spraying sa mga hotspot areas sa diin madamo sang mga kaso nga narehistro sa sulod sang duha ka asud-asud nga semana agud malikawan ang dengue outbreak.
